Rev 22 | BEF | STEP | To agelo ai mino kosaba huse nagami'i napa'a biya nonuhu suhi mone nelepigo bu go'ohuna. Ya'ma bu'a gili gili huto ni'ina to Hu'ma to sipisipi nala'a etali sekele mamu'a hiti kefa hisa maha'alugati ya'ma nagami'i nobuto,

Revelation of John 22

1 To agelo ai mino kosaba huse nagami'i napa'a biya nonuhu suhi mone nelepigo bu go'ohuna. Ya'ma bu'a gili gili huto ni'ina to Hu'ma to sipisipi nala'a etali sekele mamu'a hiti kefa hisa maha'alugati ya'ma nagami'i nobuto, 2 hepa'mofihi kapo folaganugu nomobina. To nagami'i luga luga amuya moloto oto minolatanamofihi yafalo nohina yamofihi legeya'a bona'i nelenogo gufa'ani minoba minoba huse'na ya'ma suhi huto fato fato'mo legeya'a 12 ikahi go'i lu etana lu etana kanalo legeya'a hoto luya'i lolata nohibe. Noto noto bona'magi ana yafamofihi haya'a ya'ma gufa'anilo felete minete bati hilune'mu habe. 3 Ana hepato ya'ma Hu'mamofihi gumi ho'ehina bo mone metilina'mu yabe.

Hu'ma ai to sipisipi nala'a etali sekele mamu'a hiti kefa hisa huto hulenogo bona'a kele kele'amagi enali agoya hi etete minalana'mu yabe. 4 To enali okaba'a be gelete minalana'mu yabe. To gi'amofihi fayaha'a enogobisalo huto huto minalube'mu hibe. 5 To ana hepato ya'ma metepu mone meilube'mu hibe. To libi'afi to yegemofihi fana meha'a yamofihi foya'a mone huto mehilube'mu hibe. Hena'mube? Sipi Bo, Hu'ma ai'a ya'ma fana meha'a epinogo minalana'mu yabe. To hepa'i afo'afu enali enigihiti bo kaba hise foya lelite mineme bite minalana'mu yabe.

Yesu i behe huto alinamofihi ka'a

6 To agelouba ma luto lu nimi'ehina: Kaga ya'ma lamana'a nolugo ule'ale nohinamofihi ni'ibe. Sipi Bo, Hu'ma ai Sikalafu'a ya'ma lu enabagalo enabagalo nohina bona'i noepilata bo ai'a ya'ma agelo'a ho lifigo kele kele bona'a lenali'i kana'a yatama mehu'ehinogo huto hilibe luto lu'ehina nasana lamana'a yabe luto lu epito kelepugo bu nogane.

7 Yesu ai'a ma luto nolina: Kehelibo. Nani mele'isi foiya lenalitoga bilube'mu nohube. To mone'a lenali bukugu ya'ma suguna ka huto hilina'a mone koyoto molo'ehinamo ya'ma keheli emise hite kaba hite lite minalana enali ya'ma enegelo bilune'mu habe.

8 Nani Yonita ana'ina silaga'i ya'ma bu goto kehelito li su ho'ohuna. Keheli su holoto'ni agelouba ana'ina ya'ma nelepi'ehina ai gigusa'aluga buto lipito nalapusa fi emilube'mu nohugo 9 ai'a: O'e, luto ya mehubo luto lu nimi'ehina. Nani kalalukafita nohube. To kalukagihi ka leli'ali nehana bomagihi enalalu'anifita nohuto to foya'ani ana huto noluna bo nohube. To ya'ma bukugu kaga keheliba keheliba hite neminana'a enali enalalu'nifita nohube. Kai Hu'mamofihi ai'ago ya'ma lipito kalapusa fi emibo. 10 Ya luto luloto ma luto lu nimi'ehina: Kai buku mamofihi huto hilina suguna ka'a ya'ma li fala mekibo. Kaga ya'ma lamana'a kolo hilina kana'a alo'i hupamone huto nohinagi lu yege hobo. 11 Ya hu'ehina'mu foipa nasana lilata nehana'a enali lilete nehilabe. To komopa'ani kolo tenogo enali minalune lite mine lite bite minalabe. To mono kagu fotogo hite minalune lite minalana'amagi ya'ma fotogo hite minete mine lite bite minalabe. To biye bona'i enali minalune lite ya'ma biye'i mine lite bite minalabe.

12 Yesu ma luto lu'ehina: Kehelibo. Nani mele'isi biluna'mu yabe. Buto'ni ya'ma mone kegi'a nona'a pa soto lepilube luto lito bilube'mu hube. Bona'magi lolo hite melete hi'ahanamofihi mone kegi'a li legege huto le'mo eto eto huto epiluna'mu yabe. 13 Nani kohe toto alihi moloto munuha'a to hapa'a hapi filatana to li su holatanamofihi afo'afitamo nohube.

14 Gukete'ani okala hite gulu gulu gu'ani le'mo bati bati nehana bona'magi kumu kehelugo laga'ni nebesilata nohibe. Enali ya'ma lu epinogo'ni ule'ale huto minolata yafamofihi legeya'a nelete minoba minoba nehana'amagihi ya'ma epinogo'ni nalabe to ya'ma nohi hepa'mofihi kasinugu tilabe. 15 Nohi hepa'i nosipetoga ema minalana'a enali kolo tanana li'ahana'a to nalisalo bona'i to mokolo bona'i to enoho fililata bona'i to lugefa nasanalo enalapusa fi emi'ahana bona'i to fagalo bona'i hiti enali foyati bati huto ni'ibe lite faga lilete komopa'anigu li sibina nehana'a ya'ma enali asaga'i fegutoga minalana'mu yabe. Enali hepalugu metilana'mu yabe.

16 Nani Yesuita ya'ma agelo'ni ho lifinogo ai ya'ma bona'ni li gehesamu li gehesamu lenali'i ya'ma kaga'a lu yege hoto lu lepilibe. Nani ya'ma Tebitihi tata'agihi to ai'a naga'i nohube. To go'i lilube'mu nohigo sonofi'i ofu'yahi fana meha'a nohube luto lu'ehina.

17 Hu'mamofihi Sikalafu'a to ai sipisipi nala'amofihi liha'a hiti: Kai obo, lilete nela'ibe. To luga'amagi ka'a ya'ma kehelilete ana hite ma lite lilabe: Kai obo. Luga'amagi minoba minoba nasanamofihi nagami kumu noepesinogomo magati ete hefite nalabe. Enali nalune litemo ete magati nagami'i mina'a meni'ina, fa'mene nalabe luto: Nanitoga alo, luto Yesu ya lu'ehina.

Yoniu bu enogo su ho'ehina ka'a

18 Ya'ma bukugo suguna ka fayahi koyoto molo'ehina ya'ma leka sete kehelilana bona'i nani yatai lusiga lipoti noepube: Luga'amagi enali'ani enegekesa kehelite ka mone hiti molo emilana enali ya'ma Hu'mau silaga gumi hose nasana bukugu fayahi koyoto mologo ni'ina analo molo emite mege'i malalibe. 19 To luga'amagi enali bukugu suguna ka huto hilina'mu ya'ma mone lu laga hite he'milana bona'i enalitoga Hu'ma ule'ale huto minoba minoba yafamofihi legeya'a mone'a mo si epalalina'mu, to nohi hepa'i lamana'a enali metilana'mu yabe. Ana nasanamofihi ka'a ya'ma bukugu koyoto mologo ni'ibe.

20 Ka'a huto hu'ehina ya'ma lusiga lulata bo ai'a ma luto nolibe: Lama'naka. Lenalitoga ma'asi alube'mu nohube. Lama'naka. Sipi Boti, Yesuo. Kai obo.

21 Sipi Boti Yesuhi lehe'mose'na'a lenalitoga mino moloto mineno.